Oggi martedì, concludiamo la trilogia del carnevale dei poeti dialettali cefaludesi.
Dopo Nino Testa e Totò Ranzino, non può mancare il loro Maestro Carmine Papa.
Lu Carnalivari di lu 1872
Figghioli ! È cosa seria,
La solita scialata !
Mi pari 'na cumeria
Sta carnivarata.
Lu munnu è tuttu 'ntrichi
Chisti 'un sù cosi frischi,
Sunnu custumi antichi,
Cosi saracinischi.
Qual'eni l'impurtanza
Di stu carnalivari?
Tutti' nchiri la panza,
E viviri e manciari !
Viditi ogni casata
Li maccarruna appisi,
Cc'è vinu ogni cannata,
Muscatu e calavrisi.
Cc'è ficatu arrustutu;
Miduddi 'nfazzulati,
Lu stomacu è inchiutu,
Cc'è bummi 'n quantitati;
Carduna e ramurazzi,
All'ultimu cannola,
Viditi a tanti pazzi
Cu cutri e cu linzola.
La carni è troppu cara,
Ddocu mi viju abbiuntu,
Rusidda e la gna Sara
Fannu stufatu fintu.
Nuatri jurnateri
'Ntra peni e 'ntra travagghi !
Li poviri mugghieri
Fannu stufatu d'agghi !
Bon'è avanteri notti
'Na ciappula parai,
E un surci 'ntra dui botti,
Mischinu ! Lu 'ngagghiai.
Prestu me' frati Vanni
Pigghia tigani e piatta,
Viditi chi malanni !
Cci l'arrubbau 'na gatta !
Puru cu sta gran pena
Vo' fari la cumparsa,
Ma è fraccu, 'un havi lena...
La morti chi cci lassa?
Ed eu 'un mi mettu 'n cuntu,
Ca sugnu picciriddu;
A dirilu m'affruntu,
Sugnu cchiù vecchiu d'iddu !
'Na cosa sula avvisu,
Pri strata lu cunnuciu,
E chistu eni lu risu.
Chi fa lu babbaluciu !
Me' frati e scarsu e mauru,
Ed eu cchiù fraccu d'iddu,
Però nn'haiu d'addauru
La cruna, miatiddu !
Nota : Il Poeta fu solito quasi ogni anno, per Carnevale girare sopra un carretto, insieme a suo fratello Giovanni, per le vie e le piazze della Città, recitando di così fatte poesie.
(Tratto da "Poesie Siciliane" edite e inedite di Carmine Papa zappatore di Cefalù dettate ai Prof.
R. Maranto e C. Grisanti. Cefalù Tip. Salvatore Gussio 1892)