Giovedì grasso, l'occasione per un deferente omaggio al concittadino poeta dialettale Nino Testa.

TIPI CARATTERISTICI DI UN TEMPO A CEFALU'

L'autra sira 'ntrà l'amici
si parrava du passatu,
ti ricordi, unu dici
du 'zu Turi l'arraggiatu?

Cu l'eternu quartaruni
chinu d'acqua supra i spaddi
e lu tipicu vastuni
c'arrunzava petri e baddi?

E Turicchia ca nisciva
cu lu vinu ntrà bunaca
e gridava "Evviva,evviva
l'avvucatu Misuraca";

'Ngnaziu allustra 'n punta o chianu
ch' ascutava tutti e tuttu
pò vuciava a tuttu spianu
"Viva Dragu e minni futtu!".

E Don Giuliu java a diri
'ntra i cumizi riunali
ca tintava d'abuliri
li barreri duganali;

E don Angilu sugnava
di livari lu Dimaniu
e u Cumuni lu chiamava
"Lu paisi di Lappaniu";

Mastru Turi lu Mirdidda
piritava cu li giummi
pò a la riva e a crucidda
ti sparava maschi e bummi;

Lu Paranza a portaterra
cu lu ciuri 'ntra l'aricchia
era quasi sempre 'n guerra
Cu Pirruni e cu Turicchia;

Lu Pirruni chi vanniava
carni e trippa a bon mircatu
pò u picciottu assicutava
chi l'avia bummiatu;

E Pippinu di li scogghi
lamintava pi la via
tutti i 'ntrighi e tutti i 'mbrogghi
di la cascia malattia;

Peppi Santu l'eremita
cu lu coddu un pò stuccatu
sustineva ca la vita
era nata d'un piccatu;

A don Cicciu u custureri
li picciotti camurrusi
ci gridavanu d'arreri
"Ciccinè naschi fitusi";

E la vecchia sannulichia
Chi lu Diu la binidici
ripiteva ogni tant'icchia
nenti, nenti tu mi dici?

U picciottu c'affinneva
lu zu Turi Ciaurapani
a tò soru rispunneva
ci fà fetu comu i cani;

E lu poviru Carbuni
da la sira a lu matinu
da pruvettu "mbriacuni"
ti cantava lodi o vinu;

E Sciaveriu cu calma
ripiteva a trinca tè
oltri i frasi da bonarma
"Poveretto di a mè!"

Don Mimì tuttu trimanti
ti purtava i telegrammi
e curreva traballanti
cu li peri a manu strammi;

Quartararu pi misteri
'ntra li festi a Cefalù
ti vinneva 'ntra u bicchieri
l'acqua frisca cu zammù;

A gnò Rosa la Ciuriddu
'nsirvienti du Cumuni
ti facia pigghiari u friddu
pi sparrari li pirsuni;

E Picciuca gran bravomu
lu furgiaru di viddani
ti scanciava lu sò nomu
cu la strata Vitirani;

Don Arturu 'ntabaccatu
ti facia du misteri
ammucciuni l'avvucatu
ed a vista era usceri;

E Pasquali dittu Ciocca
cu li uova 'ntra u panaru
sinni java arreri a rocca
a jucari a paru e sparu;

La zà Stefana mischina
a cagiunu du so mali
avia a casa china china
di cartazzi e di giurnali;

Mastru Minicu Varbazza
lu 'chiù anticu mastrurascia
ti murava la spaccazza
di lu stipu e di la cascia

Peppi l'orbu ti vinneva
sauri e uopi ntrà li canti
e ogni tantu ti cugghieva
pi li animi pinanti

Ricurdati Patri Turi
tantu amicu du tabaccu
ci piacia far l'amuri
cu li fimmini e cu baccu!

E di 'Mbrociu mischineddu
tuttu chi si vaviava
pò chiedeva un surdiceddu
qualchi ciciru o nà fava;

E Vincenzu Pappagnì
ntrà varberi e lu scaccinu
nun sapia lu pirchì
nun ci senti lu parrinu;

Ed Andrea Macajuni
ntisu Ninu vaddaredda
ti facia lu spranzuni
ca a picciotta e a vicchiaredda;

'Ntrà lu ranghu 'chiù elivatu
ci fu un granni pallunista,
un dutturi, un avvucatu
Ciccu Paulu e Don Tista,

Don Pippinu u cappidderi,
don Luigi l'Ebanista,
un maniscu raggiunieri
don Totò lu farmacista

Tutti chisti 'numinati
ora nun ci sunnu chiù
sunni tipi già passati
'ntra la storia a Cefalù!

NINO TESTA

(tratto da "Parramu di Cefalù"- Lorenzo Misuraca editore- 1977)

Ringrazio il Gentilissimo figliolo Totò per il graditissimo regalo.