Lu Vinu
E pista…e spremi…nasci a li parmenti,
tra soni e canti, mustu profumatu
chi vinuzzu diventa ‘ntempu nnenti:
vinuzzu ginirusu e prilibatu.
Figghiu liggittimu di la racina,
li virtù di la mamma avi ammucciati:
sunnu raggi di suli e vitamina
ch’eranu nna li coccia cuncintrati.
E’ suli d’oru a tavula lu vinu;
siddu manca la tavula è scurusa:
pari c’adduma ad ogni bicchirinu
‘na lampa risplinnenti e auguriusa!
E lu brinnisi sbuccia com’un ciuri
di lu cori di tutti li ‘mmitati
pi fari, a mai finiri, tant’auguri
a li pirsuni cari fistiggiati.
Picchì lu vinu è un gran suggirituri
e nna l’ebrezza nascinu li canti:
cantatu ha statu sempri cu firvuri,
fistiggiatu di Baccu e li Baccanti!
Ma si fa spissu la testa firriari
chi curpa avi lu vinu ginirusu
si l’omu nun si sapi cumpurtari?
Perdi lu sennu si nni fa l’abusu!...
Cu parsimonia usatu nun fa mali,
surgiva è di saluti e d’alligria;
tanti voti è un gran medicinali
ed è l’anima d’ogni cumpagnìa!
Siddu aviti un sulenni raffredduri
e bisogna fari ‘na sudata,
basta un biccheri a dari lu caluri
chi po’ sanari ‘ntempu ‘na nuttata!
Nna li jilati e nna li gran furturi
nun è l’amicu chi sapi risturari
lu poviru ‘ngriddutu agriculturi
dannuci nova lena a travagghiari?....
E di vini priggiati cci nn’è tanti:
aliaticu, barolu, malvasia,
marsala, muscatu, vinu Chianti,
can un finissi mai la litania!...
Gloria perciò lassatimi cantari
a lu vinuzzu chi nostru Signuri
binidicìu e vosi cunsacrari
pi nostru beni e nostru granni amuri.
Caterina Daniele |
